Asiap aasaq 2017-imi misissuinissai

Asiap aasaq 2017-imi misissuinissai

Aasaq 2017 Asiaq-mut ulapaarfiuvoq, assigiinngitsorpassuarnillu misissuiffiulluni. Soorlu toqqavissat nunataat, nunamik uuttortaanerit, silasiornerit, immerinerit avataarsuaniillu uuttortaanernik suliaqarfiuvoq. Uani suliatta ilaat oqaluttuarilaassavagut, aammalu angalanitsinni assilisatta ilaat facebookkimi malinnaavigisinnaassavatit. 

Aasap ingerlanerani, illoqarfiit assingi nutarterniarlugit nunamik uuttortaajartorpugut. Aasaq manna illoqarfiit Paamiut, Qaqortoq, Narsaq, Nanortalik Uummannarlu tikippavut. Nunaqarfiit Uummannap Upernaviullu pigisai aamma tikippavut, taakkulu assitaat kingullermik 2009-mili nutarterneqarmata nutartigassaqqeqaat.

Nunap assitaanik nutarterinermi aqquserngit nutaat, illut, qullilerfiit, kuuffiit allarpassuillu sanaartorfiusimasut uuttortarneqartarput. Taamaasilluni illoqarfiup assinga, piviusumut assigiissarneqareerpat, teknikkerit kommunimilu sulisut allat pilersaarusiornerminni atorsinnaalissavaat. Drone aamma misilerarlugu silaannarmit assiliornermi atorneqassaaq, orthofoto-nillu assiliortoqarsinnaassalluni. Angalanerput iluatsillugu nunaqarfiit Google StreetView-ip assiliissutaanik 360 grademik assiliisinnaasumik assiliortuissaagut.

Juli-p ingerlanerani, Tasiilami Nukissiorfiit erngup nukinganik nukissiorfianut uuttortaajartorpugut. Tassani tatsit marluk akornanni erngup qanoq sukkatigisumik kuunnera uuttortarneqarpoq. Taamaasilluni tatsip aappaa qanoq sukkatigisumik immerneqarsinnaanersoq paasineqassaaq, nukissiorfimmilu sulisut nukissiornissamut imissamaataatertik pitsaanerusumik nakkutigisinnaalissavaat.   

>Taakku saniatigut Asiaq tunup avannaarsuani Zackenbergimi, Kangerluarsunnguamilu ilisimatuussutsikkut suliniutit Greenland Ecosystem Monitoring aamma PROMICE aallaavigalugit misissuiartussapput. Maniitsumi aamma remote sensing atorlugu nunamik uuttortaajartortoqarpoq. Uani ilisimatuussutsikkut suliniutit pillugit atuarsinnaavatit www.asiaq.gl/kl/ilisimatusarnikkut-suliniutit.