Igalikumi angerlarsimaffik Google Earth-ikkut takutinneqarpoq

Igalikumi angerlarsimaffik Google Earth-ikkut takutinneqarpoq

Sapaatip akunnerani uani Google nutaavimmik nittartakkakkut Android-ikkullu Google Earth –imik saqqummiivoq. Google Earth nutaaq ukiut marluk piareersareerlugu, annertungaatsiartumik ersarissarneqarlunilu nutaanik atortulersorneqarsimasoq saqqummiunneqarpoq. Soorlu Google-ip nassuiaaneratut ’Nunarsuarput iserfigalugulusooq qanoq innersoq maanna takuniarneqarsinnaalerpoq’.

Atortut nutaat ilaat tassaavoq Home Project, tassani avataaniit angerlarsimaffinnut avinngarusimalluinnartunut qanilleriarlutit pulasuusisinnaavutit. Tassani oqaluttuarineqartumi Malene Egede-p igalikormiup angerlarsimaffia takuniarneqarsinnaavoq. Oqaluttuami assimilu takuneqarsinnaavoq qanoq avinngarusimasumi savaatillit kujataani najugaqarnersut.

Asiaq 2014-imili Visit Greenland, Air Greenland aammalu Google suleqatigalugit illoqarfinni nunaqarfinnilu Google Street View Trekker atorlugu assiliortuisimavoq, assiliinermilu assiliivik sammivinnut tamaanut ataatsikkut ingerlaarnermi assiliisartoq atorneqarsimavoq. Internetikkut Streetview iserfigalugu, maanna piumasunit Kalaallit Nunaanni illoqarfiit alakkarneqarsinnaalerput, taamaasillutalu nunarput nittarsaannerulersinnaalerparput. Massakkumut Asiaq kajumissutsiminnik ikiuuttunik assiliortoqateqarluni, illoqarfiit nunaqarfiillu 44-it Kalaallit Nunaanniittut assiliorneqarsimalerput, tassani Igalikomiup Malene Egede-p angerlarsimaffia takutinneqartunut ilaavoq.

Malene Egede, This is my home Google Earth-imi