Avannaani Sermit Innaat

Avannaani Sermit Innaat

Suliniummi tassani , Kalaallit Nunaanni ’Pulje C’ aqqutigalugu aningaasalersorneqartumi, Avannaani sermersuup killingata sumiiffigisaani allanngornernik kingullerpaanik misissuivugut. Nunap annerpaartaani sumiiffinnut sanilliullugu maani sumiiffinnik, sermersuup killingata siuariartortumik ingerlaarfigisaanik nassaarsimavugut, naak sermip iigartartup oqimaassutsimigut oqimaaqatigiinnera negativiugaluartoq.  Isumaqarpugut Kalaallit Nunaata ilaani taakkunani sermip killingisa qutaarluusut ’ice cliff’-it tamatumunnga pissutaasut. ’Ice cliff’-inik taaneqartartut tamakkua silap pissusaani pissutsinik sermersuup ingerlaarneranik pissuteqarput, tamakkualu maannamut annikitsuinnarmik misissuiffigineqarsimallutik. Taamaattumik suliniutip tamatuma immikkoortuani siullermi Kalaallit Nunaata avannaani ’ice cliff’-it nunamiittut sumiiffissinissaat aamma siammarsimassusaannik, sumiiffiinik ilisarnaataannillu nalilersuinissaq anguniagaraarput. Sermip sinaata sananeqaataanut ilisarnaatinik erseqqissunik soorlu isorartussutsinik, portussutsinik, sammivinnik qutaarluussutsinillu inissitsiterinissamut paasissutissanik remote sensing aqqutigalugu pissarsiarineqartunik erseqqilluinnartunik atuiniarpugut. Portussutsinut takussutissanik digitaliusunik 1980-ikkunneersunik  paasissutissat qanittukkut naqitanngorlugit saqqummersinneqartut sermip sinaata inissisimaffigisaata sumiiffia pillugit paasissutissanik tutsuiginartunik pissarsivigineqarnissaannut naammatumik erseqqissuseqarnerat paasinarsisimavoq. Taamaalilluta paasissutissat remote sensing aqqutigalugu pissarsiarineqartut nutaat ilanngullugit sermersuup sassariartortarneranut tunuakariartortarneranullu takussutissanik taakkualu annertussusaannik takunnissinnaavugut. Avannaani ’ice cliff’ uppernarsaasersorluarneqartutuaq (Red Rock ice cliff), maluginiarnartumik sassariartorneranik malussarfiusimasoq, 2017-imi aasakkut takuniaqqinniarparput. Ice cliff-ip taassuma ullumikkut sumiiffia nalunaarsorniarparput silallu pissusaanut tunngasut uuttortarniarlugit. Tamanna sermip sinaata ineriartornera pillugu ukiuni 70-ini oqaluttuassartamik asseqanngitsumik inerneqassaaq. Suliniut Østrigimi Graz Universitet, aamma Hollandimi Utrecht Universitet, suleqatigalugit ingerlanneqarpoq.

Titartagaq 2: Sermip qaavata portussusaata 1985-ip aamma2015-ip akornanni allanngoriartorneri, sermip sinaa 1985-imi (tungujortoq), 2007-imi (sungaartoq) aamma 2015-imi (qorsuk). Qarsuusanit sermip ingerlaarfiata sammivigikannigaa takutinneqarpoq.