Remote Sensing

Remote Sensing

Tunup Avannaarsuata sineriaa assiliorneqarnera

Projektimi siunertarineqarpoq qaammataasanit assilisat atorlugit Tunup Avannaarsuani nationalparkip sineriaa, kulbrintinik misissuiffiusoq assiliorneqarnissaa. Projektimi assilioriaatsit nutaaliat atorlugit aammalu paasissutissat massakkumut pigineqartut aallaavigalugit, sineriak aammalu sissat assigiinngitsut nalunaarsorneqassapput.

Nunarsuatsinni sissat pillugit aammalu pinngortitap ataqatigiinneranut paasissutissat annikiginarsinnaasarput, ingammik nunatta Tunup Avannaarsuata sineriaani allanngutsaalisami. Tunup Avannaarsuani kulbrintinik misissuinissat soqutigineqaraluttuinnarneri ilutigalugit, pilersaarusiorneq aammalu avatangiisinut tunngatillugu upalungaarsimanermut, taamaasillunilu aalajangiinissamut aallaaviusinnaasunik, paasissutissanik katersinissaq pingaaruteqarnerujartorpoq.

Nunatta kitaani kujataanilu avatangiisit uuliakoorfigineqarnissaminnut eriagisassat atlasiliarineqarnikuupput (Environmental Oil Spill Sensitivity Atlases), Tunulli Avannaarsuani taamaattumik assiliortoqarsimanani. Taamaammat una projekti paasissutissanik pisariaqartinneqartunik inuiaqatigiinnullu atorluagassaqqissunik pilersitsissaaq. Projekti, isorartuumik assiliornernut paasissutissanik pilersuissaaq aammali sumiiffimmi aalajangersimasumi sukumiinerusumik atlasiliortoqassalluni. Nunamik assilioriaaseq nutaaliaasoq atorneqassaaq, qaammataasanik assilisat nutaanerpaat atorneritigut nunap assinginik ersaarissunik assiliortoqassalluni. Assiliat tamarmik allanut naleqqiussinermi atorneqarsinnaassapput, aammalu assilioriaatsit atorneqartut pitsaaqutaat ajoqutaallu misissorneqassapput.        

Suleqatigineqartut:

Pinngortitaleriffik (http://www.natur.gl)

DHI GRAS (http://www.dhi-gras.com/)

ESA GlobPermafrost

Nuna qeriuaannartoq, silaannaap kiatsikkiartornerani sumiiffinni qerisuni (Cryospherimik taaguutilinni), allanngortuni malunnaateqarnerpaat ilagaat. Nunatsinni nunat qeriuaannartut aammalu aakkiartornerisa ilutigisaanik nunap atortulersuutaanut malunnaatilimmik sunniuteqartussaapput. Europami Space Agency-ip suliniut GlobPermafrost-imik taasaq aallarnerpaa (2016-2019), tassani avataanit uuttueriaaseq atorlugu, nunamik qeriuaannartumik ujaarlernerit, malittarinninnerit, periuutsillu siuarsarneqassapput. Projektimi, paasissutissat ineriartortinnerisigut, tatiginassusaasa nalilersornerisigut atuutilersinnerisigullu, neriuutigineqarpoq misissuisunut, oqartussanut aalajangiisartunullu iluaqutaalernissaat.

Suliniummi Asiaq atuisunut tunngasunik suliaqassaaq. Nunatsinni permafrostimik suliallit suleqatiginerisigut, siunnersuutinik sumi sunillu datanik aallerfiusinnaasunik Asiaq siunnersuissaaq; aammalu pilersinneqartut tatiginassusaat malittarinninnerillu nalilersussavai. Qeqertarsuup eqqaa, nunami sermitalimmi sisujartortortummi misissuisoqassaaq.

Suleqatigineqartut:

https://www.globpermafrost.info/cms

Qeqertarsuaq_Ilulissat

Asseq. Qeqertarsuaq-Ilulissat eqqaat misissuiviusussaq aammalu Disko, Ilulissat Paakitsorlu.

Tunup Avannaarsuani aarrit kisinneqarsinnaanerinik suliniut

Projektip uuma, qaammataasanit pitsaasunik assilisat atorlugit issittumi uumasunik kisitsinermik misilittaataavoq. Projektimi Pinngortitaleriffik suleqatigineqarpoq, tassani misilittakkat katersorneqassapput neriuutigineqarporlu misilittaanerup kingunerissagaa, sukkanerusumik eqaannerusumillu uumasunik kisitsisoqartalersinnaanera.

Asiap Digital Globe-imit assilisat atorlugit, Kalaallit Nunaanni aarrit kisinneqarsinnaaneri misissorpaa. Assilisat taakku ersarissut GIS programi atorlugu aammalu ilisarsiniut Ecognition atorneqarput.

Suleqatigineqartut:

Pinngortitaleriffik (http://www.natur.gl)

Nunap ilusaata aammalu geologiata Tunup Avannaarsuani assiliorneqarneri

Projektip uuma siortaraa, Aatsitassanut Ikummatissanullu Naalakkersuisoqarfiup Tunup Avannaarsuani nunap assinginik geologimut tunngasunik nutaanik digitaliusunik assiliortoqarnissaa. Projektimi Asiap GEUS suleqatigissavaa, tassani avataanit uuttortakkat aammalu nunap ilusaata assingi (assit topografiskit) nutaat aallaavigalugit assiliortoqassalluni. Nunap assingi geologimut tunngasut, geologit sulinerminni iluaqutigilissavaat.

Nunap ilusaata assinga 20.000 km2-isut isorartutigisoq assiliorneqassaaq, tassani nunap ilusai ersarissumik titartakkat ArticDEM-it aallaavigineqassapput, qaammataasaniillu assilisanik ilaartorneqassallutik. Isorartuumik nunap ilusaata assingata qaarsortai qaleriiaat nuisarngi, piffimmi Mesizoic-imeersuupput. Nunap ilusaata titartagartaa nutaajunerusup atorneratsigut, uuttortakkat allat sumiiffii eqqornerulersissavaat assigiiaarnerulersillugillu, aammalu paasissutissat atorluarsinnaanerulersissallugit. Nunap ilusaata uuttortagartai aallaavigineqartut tamanut atuagassianngorlugit aamma suliarineqassapput.

Qaammataasanit assilisat ASTER, Sentinel-2 aammalu Landsat-8 –eersut, nunap geologiata titartarnissaanut atorneqassapput. Taakku qaammataasanit assilisat atorneqarajupput aammalu nunap allanngorarnerinut annerusunut soorlu geologiata ilusaasanut, nuisaneqarfiit ilusaasa (lithologi)  allanngorarnerinut, sammiviinut, siorarsuit ujarassuillu sumiissusersinissaanut atorneqartarlutik. Tunup Avannaarsuani uuliasiorneq eqqarsaatigalugu, paasissutissat pitsaasut nunami sumiiffimmi aalajangersimasumi sukumiinerusumik nunap geologiata titartarneqaqqinnissaanut atorneqarsinnaalissapput. Paasissutissat kikkunnit tamanit atorneqarsinnaalissapput.

Suleqatigineqartut:

Aatsitassanut Ikummatissanullu Naalakkersuisoqarfik

GEUS (http://www.geus.dk/DK/Sider/default.aspx)

Qaanaami nunap sisuneri, avataanit uuttortaaneq aallaavigalugu nalilersorneqarneri

Qaanaami innutaasut illoqarfiup atortulersuutaasa nikikkiartorsinnaaneri aarleqqutigilersimavaat. Illut toqqaviisa malunnaatilimmik kiviartornerisa kinguneranik, toqqaviit ilaat quppartitilersimapput. Aasaq 2017 geotekniskimik qillerinertalimmik isorartuumik illoqarfik misissorneqassaaq, tassani nuna qeriuaannartoq nalunaarsorneqassalluni.  Paasissutissat ilaartorniarlugit, Asiaq aamma GAMMA remote Sensing nunap qaavata sisujartornera uuttortassavaat, tassani nuna sisusimanerpaaq ajoqutaalersinnaanerpaarlu sumiissusersineqassapput. Asiap uuttukkat DEM-imeersut aammalu timmisartumit assilisat aallaavigissavai, aammalu uuttuinermi nalerarineqartartut nikinneri uuttortassallugit. GAMMA-p misilittaalluni qaammataasamit radar-imit uuttukkat atorlugit, sisunerit qanoq annertutigineri uuttortassavaat. Tassani periuseq Differential Interferometric Syntethetic Aperture Radar (DInSAR) atorneqassaaq.   

Suleqatit:

DTU BYG (http://www.dtu.dk/service/telefonbog/person?id=11189&tab=3&qt=dtuprojectquery#tabs)

GAMMA Remote Sensing (https://www.gamma-rs.ch/gamma.html)

Kalaallit Nunaanni nunap assinga digitaliusoq nutaaq

Projekti annertooq, Kalaallit Nunaanni digitaliusumik nunamik assiliorniarneq aallarnisarneqarpoq, tassani qaammataasanit uuttukkat aallaavigineqassallutik. Assilioriaaseq nutaaq misilittarneqassaaq kingornalu misilittagarineqalersut assiliornermi aallaavigineqassapput. Kalaallit Nunaanni sumiiffiit sisamat assiliornermi misilittaavigineqassapput; Qeqertarsuup Tunua, Narsaq, Tasiilaq aammalu Tunup Avannaarsuani Zackenberg. Nunap ilusaata assinga (DEM) Airbus DS atorlugu titartarneqarsimavoq, tassani timmisartumit assilisat imaluunniit qaammataasamit assilisat ersarissut aallaavigineqarsimallutik. Assiliornermi suleqatigineqarput DHI GRAS A/S.

Misilittaanermi Asiaq assigiinngitsorpassuartsigut peqataasimavoq. Assinik toqqorsivipput aammalu sumiiffinni nalunngisaqarnerput DEM-imut vektor data-nut pitsanngorsaataasimaqaat (Immap killinga, kuuit, tatsit, assigisaallu). 

Projekti Styrelsen for Dataforsyning og Effektivisering-imit ingerlanneqarpoq.

Suleqatit:

http://sdfe.dk/saadan-arbejder-vi-med-data/groenland-og-faeroeerne/

 Remote Sensing