Asiaq Qullissat pillugit toqqortaatinik saqqummiussivoq

Asiaq Qullissat pillugit toqqortaatinik saqqummiussivoq

Qullissat

Asiaq, Kalaallit Nunaanni Misissueqqaarnerit, Qullissat pillugit paasissutissanik pisoqqanik nutaanillu www.asiaq.gl/Qullissat maanna saqqummiussivoq. Asiaq, Kalaallit Nunaanni Misissueqqaarnerit, kunngikkormiut Qulllissanut tikeraarnerat aamaruutissarsiorfitoqaasimasumilu nunat tamalaaneersut ilisimatusarnerat tunngavigalugu aasaq manna toqqortaatinik sumiiffimmilu misissuivoq.

Toqqortaatit 1958-imiit 1968-imut ukiuni qulini suliassaatigineqarsimasunik imaqarput. Taakkunani illoqarfiup ingerlalluartup ineriartorneranut kingullermut atorunnaarsikkiartuaarneranullu teknikkikkut paasissutissat nassaassaapput. Illoqarfiup uuttortaavigineqarnera siusissoq, illoqarfiup atuarfiata illutaata oqaluttuassartaa, imermik pilersuineq pillugu apeqqutit uteqqiattut allallu illoqarfiup uummaarissup siuariartortinneqarneranik aserfallatsaalineqarneranillu paasissutissiilluarput.

Asiaq juunimi Qullissaniippoq nunap ilusaa malillugu assiliornissamut silaannarmit assiliiartorluni Google Streetviewimullu assiliiartorluni. Illoqarfik Kalaallit Nunaata qaammataasaniit assiliorneqarnerata najoqqutassanut naleqqussarneqarneranut atorneqartussaavoq, taamaattumik illoqarfimmi sumiiffinni assigiinngitsunik qaqortunik krydsilersuisoqarluni allanillu nalunaaqutsersuisoqarluni.

Henrik Forsberg, Suliniutinut pisortaq aamma Misissueqqaarnernut pisortaagallartoq, ima oqarpoq: "Qullissat inuit amerlanersaannut suliffeqarfimmullu Asiatut ittumut pissanganartumik oqaluttuassartaqarpoq. Oqaluttuatoqaavoq piareersaanermut pilersaarusiornermullu atatillugu suli ilinniarfigisinnaasaarput. Asiaq tamatuma peqatigisaanik paasissutissaatimi qarasaasiakkut saqqummiunnissaannik sulissuteqarpoq, Qullissallu sungiusaatigissallugu tunngavissatsialaavoq.Neriuppugu teknikkikkut toqqortaatit inuppassuarnit soqutiginartinneqarlutillu ilikkagaqarfissatut isumaqarfigineqassasut. Ukiuni aggersuni annertunerusumik saqqummiussisoqartarumaarpoq."

Paasissutissarpassuit soorlu qillerinikkut qaqitanik allaaserisat, assilisat teknikkikkullu paasissutissat allat nutaaliaasumik pilersaarusiornermi sanaartornermilu suli ullumikkut atorneqartarput, taamaattumik paasissutissaatit ajornanngitsumik pissarsiarineqarsinnaasunngortinneqarnissaat pisariaqartinneqarpoq.