Asiaq sila pillugu nittartakkamik nutaamik pilersitsivoq – Kalaallit Nunaanni sumiiffinni 40-t sinneqartuni silap maannakkorpiaq qanoq innera takusinnaanngorpat!

Asiaq sila pillugu nittartakkamik nutaamik pilersitsivoq – Kalaallit Nunaanni sumiiffinni 40-t sinneqartuni silap maannakkorpiaq qanoq innera takusinnaanngorpat!

Vejret nu

Illoqarfimmi najukkanni, illoqarfimmi aanakkuit timmisartumik aallarfigisassaanni imaluunniit sineriak sinerlugu ingerlaarfigisassanni silap maannakkorpiaq qanoq innerata takunissaa aatsaat taama ajornanngitsigilerpoq. Asiap sila pillugu nittartagaa nutarterneqaqqammersoq, sila.asiaq.gl, aqqutigalugu illoqarfinnit, nunaqarfinnit sinerissap avataani sumiiffinnit 40-t sinneqartunit silamik nalunaarutit maannakkorpiaq atuuttut malinnaavigisinnaanngorpatit. Tassani kiassuseq, anori, silaannaap naqitsinera, isikkivigissuseq allarpassuillu maannakkorpiaq atuuttut siusinnerusukkullu atuuttut takusinnaavatit. Nittartakkami ataatsimoortumi, paasiuminartumi atoruminartumilu sila pillugu paasissutissanik attuumassutilinnik nutartikkanillu takusassaqarneq imaatigut nunakkullu isumannaallisaanermut pingaaruteqarpoq. Maanna silamut aninnginnermi eqqortumik atisalersornissaq ajornannginnerulerpoq. Silamik nalunaarutit tamatuma saniatigut oqaasertalersorneqarput isigiarsuttunullu iluaqutaasumik atuffassissutigineqarnissamut piareersimallutik.

Arctic Winter Games sila pillugu paasissutissanik atorfisssaqartitsissaaq

Piffissaq nittartakkamik pilersitsiviusoq nalaatsornerunngilaq. ”Arctic Winter Games ingerlanneqaraluttualermat AWG-mi pisussat ataasiakkaat ataanni silap qanoq innerata takusinnaanissaa aaqqissuisunit isiginnaarianillu soqutigineqarluassaaq” – suliniummut aqutsisoq Majbritt Westring Sørensen oqarpoq. Nangillunilu: ”Taamaattumik sila pillugu nittartagaq naammassiniarlugu immikkut ittumik sulisimavugut, Nuummi illoqarfiup qeqqani, mittarfimmi, sisorarfiit qaavani Qinngutsinnilu sila qanoq innersoq takuneqarsinnaaleqqullugu”. ”Aaqqissuussinernut matumatut ittunut sila apeqqutaalluinnartuuvoq – silalu pillugu qanorlu ineriartorneranik ilisimasat pilersaarusiornitsinnut pilersaarusioqqinnitsinnullu aalajangiisuulluinnarput. Taamaattumik pissutsinut eqqarsaatigineqarsinnaasunut tamanut piareersarsinnaassagutta silasiorfiit pingaarutilerujussuupput” Arnakkuluk Jo Kleist, Assistant to General Manager for AWG, oqarpoq.

Amerlanerit sukkanerusorlu

Sila pillugu nittartagaq nutartigaq Asiap sila pillugu nittartagaanut ilisimaneqarluartumut (URL-ip assinga) sumiiffinnit assigiinngitsunit 19-init silasiornernik takutitsumut taartaavoq. Sumiiffiit manna 42-nik amerlassuseqalerput minutsinillu 17-iinnarnik kingulliulluni nutarterisoqartalerneratigut sila maannakkorpiaq atuuttoq nutaanerusinnaanngilaq. Maanna sila.asiaq.gl iserfigisinnaanngoreerpat sumiiffigisannilu sila qanoq innersoq takullugu.