Paulus Olsenimut eqqaaniut

Paulus Olsenimut eqqaaniut

Suleqaterput toqukkut qimagummat Paulus Olsen ilissavarput Annaassisitta Oqaluffiani ulloq 8 jan.2018 nal.aqqanernut, kingornalu iliveqarfimmut qaniussavarput, qanioreerutsigulu Asiaq-ip nerisarfiani kaffillertoqassaaq Qatserisut 8-mi nal. 13-16.

 

Aliasullunga nalunaarutigissavara Asiami ukiorpassuanngortuni sulisuusimasoq Paulus Olsen toqukkut qimagummat.
Tassanngaannartumik ilimaginngisamillu pivoq, nunani allani nuliani asangaakkani Jette feriaqatigalugu pimmat, ilaqutai, ikinngutai suleqataalu assut tupaqqapput. Paulus 64-iinnarnik ukioqalerpoq.
Paulus siullermik 1995-imi Asiani sulilerpoq, Mittarfeqarfimmilu sulereerluni 2007-imi Asiamut uterpoq, kingornalu Kort og Geodatagruppemiissimalluni.
Taamaalilluni Paulus illumi sulisuni misilittagaqarnerpaat ilagaat, inuusimavorlu qaqugukkulluunniit naatsorsuutigineqarsinnaasoq, ullaarnganiit uummarissoq, napparsimaneq ajortoq aammalu inussuiarnertuaannartoq, naammagittartoq ikiuiumatoorlu. Suleqatiminut taamaassimavoq, annermillu Nunap assinginut pisiniarfimmi sullitanut taamaassimavoq, qasutsuilluni isumagiuarsimasani. Ukiut tamaasa Kalaallit Nunaanni illoqarfinni nunaqarfinni misissuiartorluni angalaartuarnerni misilittagaqarluartuusimavoq suleqatikkumarnituullunilu, uuttortakkat tamaasa naammassitserlugit eqqissisimalluinnarluni ulapittuartoq. 2017-imi misissuiartornerit suliai kingulliupput, assorsuarlu maqaasineqassaaq; nuannersumilli piffissat Paulusimik ilagiffigisarsimasagut qutsatigiuaannassavagut. 
 
Ilaqutaasut eqqarsaatitsigut najorpagut.
 
Bo Naamansen
Pisortaq suleqataasorlu