Asiami ilisimatuussutsikkut misissuinerit saqqummiulluarneqartut

Asiami ilisimatuussutsikkut misissuinerit saqqummiulluarneqartut

Asiami ilisimatuut marluk Jakob Abermann aamma Kirsty Langley-p ilisimatusaammi suleqataaffigisaat, ilisimatusarnermut tunngassutilinni saqqummersartut tatigisaanerit ilaanni Nature – International weekly journal of science.

Mette Bendixen Københavns Universitet-imeersup allaatigisaa “Delta progradation in Greenland driven by increasing glacial mass loss” (Kalaallit Nunaanni sermersuup aakkiartornerata ilutigisaanik kuuit paavisa nikikkiartorneri) saqqummersinneqassaaq.

Allaatigisami sammineqarpoq, silaannaap kissatsikkiartornerata ilutigisaanik sermersuarmit erngit kuunnerulernerisa aammalu immap sikuusarnerata sivikinnerulernerata sunniutaanik, Kalaallit Nunaanni 1980-ikkuniilli kuuit paavisa nikikkiartulersimaneri. Issittuni allani, kuuit paavi neriorneqarput, killornguanilli Kalaallit Nunaanni kuuit paavi silammukariartorput. Ilisimatusarnermi Kalaallit Nunaanni kuuit 121-it misissorneqarsimapput, tassani 1940-kkunni timmisartumit assilisat, qaammataasanik assilisanik nutaaliaasunik 2010-kkunneersunit assilisanik naleqqiunneqarput. Assersuutigalugu Kangerlussuarmi kuussuup marrartarisaata killinga silammukariartorpoq, sermersuarmit aattup kuunnerulernerata immallu sikuunerata sivikinnerulernerata kinguneranik. Kuuit paavisa silammukariartorneri innuttaasunut pilersaarusiortussanullu soqutiginaateqarput, tassami kuuit paavisa silammukariartornerisa kinguneranik illoqarfiit iml. piniariartarfiit kuuit timaaniittut tikikkuminaannerulersinnaammata imaluunniit periarfissanik nutaanik ammaassisinnaallutik.

”Ilisimatusarneq Asiap suliaasa pingaarutillit ilagaat. Paasitinneqarattalu Asiami ilisimatuut suliaasa ilaat Nature-imi saqqummersinneqassasut nuannaartorujussuuvugut.” Asiap pisortaa Bo Naamansen taamak oqarpoq. “Nunat assigiinngitsut akornanni ilisimatuussutsikkut suliat pitsaasut Nature-mi saqqummersinnissaat sapernartorujussuuvoq, taamaammallu Kalaallit Nunaannit suleqatitta saqqummersitsineri nuannaarutigaarput.”

Ilisimatusarneq pillugu uani filmiaqqami eqqartorneqartoq takuneqarsinnaavoq:

http://www.undergroundchannel.dk/secret/19042312/0668dd99487ba752450938c0396c61cb

Allaatigisaq “Delta progradation in Greenland driven by increasing glacial mass loss” 5. oktober 2017-imi Nature International weekly journal of science-imi saqqummersinneqassaaq.

(Asseq: Nicolaj Krog Larsen)