Sannavik Asiap qullersaqarfiata akiani inini nutartikkani inissisimaffeqarpoq.

Sannavimmi suliarineqartartut

Asiami teknikerinut suliassat pingaarnerit ilaat tassaavoq silasiorfinnik imermullu tunngasuni uuttortaavinnik Kalaallit Nunaat tamakkerlugu misissueqqaarnernut assigiinngitsunut atatillugu Asiamit ingerlanneqartunik aserfallatsaalisarneq. Taamatuttaaq inniminniinerit tunngavigalugit uuttortaavinnik assigiinngitsunik tunniussaqartarlutalu kiffartuussisarpugut.

Asiami teknikerit uuttortaanermi atortorissaarutinik elektroniskiusunik, nunamik uuttortaasartut angalanerminni atortagaannik, ikkussuineq iluarsaassinerlu isumagisarpaat. Taamatuttaaq Asiami suliniutinut allanut elektronik atortorissaarutillu pillugit ilisimasanik tapersiissuteqartarnissaq sannaviup suliassaraa.

Paasissutissanik katersisarnermi nunat tamalaat akornanni najoqqutassat – Issittumut naleqqussakkat

Asiap uuttortaaviisa nunat tamalaat akornanni najoqqutassat malillugit uuttortaasalersinnissaannik ineriartortitsinissaq sannavimmit sulissutigineqarpoq. Tamatuma peqatigisaanik najoqqutassat issittumi pissutsinik immikkuullarissunik sillimaffiusut oqaasertalersorneqarnissaat kiisalu aaqqiissutissanik paasissutissat nunarsuaq tamakkerlugu atorneqarsinnaalissutigisaannik nassaarniarnissaq pisariaqartinneqarpoq.

Issittumi pissutsini malussarniutit assigiinngitsut uuttortaanermut atorneqarsinnaassusiinik ingerlaavartumik nalilersuisarpugut. Issittumi atortorissaarutinik elektroniskiusunik paasissutissanillu nassuissuisarnermut pissutsit ilungersunartuunerat pissutigalugu atortorissaarutinik elektroniskiusunik ineriartortitsinissaq suliassaavoq uatsinnut pingaarutilik. Pingaartumik sialummik nittaallanillu uuttortaasarnermut periutsit pitsanngorsarneqarnissaat pisariaqarluinnalersimavoq. Taamatuttaaq isorartuumut paasissutissanik nassiussisarneq pillugu ilisimasanik nutarterinissaq salliutinneqarnerpaanut ilaavoq.

Lærlingit ilinniartitaanerat

Elektronikkimik suliaqarfiup iluani lærlinginik Kalaallit Nunaanni inuiaqatigiinnut ilinniartitsisarnissaq sannavimmit aamma isumagineqartarpoq.

Suliassanut ataqatigiissaarisoq attaveqarfigiuk Jonathan N.K. Petersen.