Asiaq Kalaallit Nunaanni illoqarfinni nunaqarfinnilu tamani nunap assinginik tunngaviusunik teknikkimut tunngasunik nutarterivoq. Nunap assingi digitaliusumik 3D-mik paasissutissartalersorlugit nunallu tamat akornanni naleqqanik atueriaatsimut UTM-imut aalajangersarneqarlutik. Nunap assinginut tunngaviusunut silaannarmit assilisat 2000-imeersut Nuummili 2006-imeersu ilaapput.
 
Nunap assingi tunngaviusut aallaavigalugit Asiaq nunap assinginik assigiinngiiaartorpassuarnik assigiinngitsunik qulequtalinnik immikkullu ittunik suliaqartarpoq. Nunap assingi tunngaviusut aamma nunaminertanik akuersissuteqartarnermi illuutillu normuinut NIN-imi – Kalaallit Nunaanni Nunaminertanik Nalunaarsuiffimmi – tunngavittut atorneqarput kiisalu MapInfo GIS-imi nunap assinginut tunngavittut atorneqarlutik.

Sumiiffiit tikillugit nutarterinerit

Asiaq uuttortaasartortavut peqatigalugit Kalaallit Nunaanni illoqarfinnut ukiut marlunngorneri tamaasa nunaqarfinnullu ukiut sisamanngorneri tamaasa tikeraartarpoq nunap assingini tunngaviusut nutarterumallugit.
Sumiiffinni tamakkunani suleriaaseq aalajangersimasoq malittarineqartarpoq. Siullermik nammineq ornigulluni nakkutilliiartortoqartarpoq, sumiiffimmi allannguutit misissorneqartarlutik suullu tamarmik nalunaarsorneqartarlutik. Kingorna uuttortaanerpiaq ingerlanneqartarpoq, illut ungallullu il.il. ilanngunneqartarlutik. GPS-imik atortorissaarutit nassartarpavut - GPS-RTK-mik taasat – 2-3 cm-ilu angullugu eqqoqqissaassusilimmik uuttortaasarluta. Taamatuttaaq pitsaassusersiuisoqartarpoq paasissutissanillu qulakkeerisoqartarluni, uuttortarneqarsimasut tamarmik naatsorsorneqarfigisaannik kiisalu nakkutilliinissaq pillugu nunap assinginut tunngaviusunut nuunneqarfigisaannik. Pitsaassutsimut uppernarsaatit assigiinngitsut immersorneqartarput paasissutissallu tammatsaaliorneqartarlutik.

Suliareqqiineq saqqummersitsinerlu

Uuttortaanerit kingornatigut pissarsiat allaffimmi CAD-mik programmi MicroStation atorlugu suliareqqinneqassapput, tamatumanilu uuttortakkat nutaat siusinnerusukkut uuttortakkanut ataatsimoortinneqartarlutik nunallu assingi sumiiffinnut ornigulluni allattugarineqarsimasut malillugit inaarsarneqartarlutik. Suut tamarmik 3D atorlugu suliarineqartarput. Tamatuma kingorna nunap assingi digitaliusut nunap qaavani qulaanilu immikkuualuttunut kiisalu sumiiffimmi aqqusernit aqqusineeqqallu qeqqinut immikkoortiterneqartarput. Ilusilersuineq aaqqissuussinerlu naammassineqaraangata nunap assinga tunngaviusoq sumiiffik tikillugu pilersaarutiniit nunap assingata naammassineqarnissaa tikillugu misissorneqartarpoq, tamatumalu kingorna nunap assinga tunngaviusoq saqqummersinneqarnissamut piareerneqartarluni atuisunullu ingerlateqqinneqarsinnaalersarluni, assersuutigalugu AutoCadimut imaluunniit MapInfomut nuullugu.
 
Nunap assinginik tunngaviusunik nutarterineq suliassanik ataqatigiissaarisumit Bo Naamansen siuttuuffigineqarpoq.
 
Ukiup ingerlanerani sumiiffinnut misissuiartornissat