Nunap sananeqaataanik paasissutissat aamma Nunap assinginik pisiniarfik

Asiami nunap sananeqaataanut paasissutissanik suliaqartartut Kalaallit Nunaanni illoqarfinni nunaqarfinnilu tamani nunap assiliornermik ingerlataqartarput. Tamatuma saniatigut GIS-imik – Geografiske Informations Systemer – atuinerup iluani kiffartuussisarlutalu siunnersuisarpugut, taannalu iluaqutigalugu Kalaallit Nunaanni Nunaminertanik Nalunaarsuiffik, NIN, aqutaraarput.
Suliassanut ataqatigiissaarisoq attaveqarfigiuk Bo Naamansen.
 
Nunap sananeqaataanik paasissutissanik suliaqartartut tassaapput nunap assiliornermi kiisalu nunamik uuttortaanermi teknikerit, GIS-imi siunnersortit nunamillu uuttortaanermi nakkutilliisoq. Nunap assinginik digitaliusunik sanaartortarpugut nunallu assinginik sulianik arlalissuarnik CAD-mut GIS-imullu atugassanik kiisalu pappialamut naqitanik PDF-imullu sulianik tunisaqarsinnaalluta. Nunap assinginik suliavut Kalaallit Nunaanni inuiaqatigiinni sumiiffippassuarni atorneqarsinnaapput, annermilli pisortani sanaartornermilu. Nunap assiliavut tunngaviusut aamma pisartagarineqarsinnaapput. 
Nunap assinginik pisiniarfik attaveqarfigiuk.

MapInfo GIS aamma WebGIS

MapInfo GIS-imik tamatumanilu ilinniartitsinissamik neqerooruteqarnitsigut sullitavut nunap assinginik digitaliusunik PC-mi suliarinneqqinnissamik periarfissittarpavut. GIS  aqqutigalugu nunap assingi digitaliusut databaseni paasissutissanut atassuserneqarsinnaapput. Taakkunani nunap assingi tunngaviusut, ortofotos (silaannarmit assilisat), sullitat namminneq nunap assiutaat nunallu assingi allarpassuit, ilaatigut internettikkut takuneqarsinnaapput.
 
Kalaallit Nunaanni iluarsaaqqiinissami nunap immikkoortuisa akornanni attaveqatigiinnermi GIS qitiusumik inissisimaffeqalissaaq, PC-ni ataasiakkaani MapInfotut kiisalu Internettikkut WebGIS aqqutigalugu. GIS-ip aamma WebGIS-ip iluani siunnersuisarnikkut Kalaallit Nunaanni inuiaqatigiit ilisimasanik nutaanik peqalernissaat Asiamit sulissutigineqarpoq, Kalaallit Nunaannilu WebGIS-ip pilersinneqarnissaa pillugu allat suleqatigineqarlutik.
GIS-imi siunnersortit attaveqarfigiuk Karl Brix Zinglersen

Suliassaqarfiit akimorlugit suliniutit

Nunap assinginik tunngaviusunik Nutarterineq. Asiami nunamik uuttortaasartut Kalaallit Nunaanni illoqarfinnut nunaqarfinnullu angalasarput nunap assinginik tunngaviusunik digitaliusumik nutarteriniarlutik GPS-imik atortorissaarutit nutaaliaalluinnartut eqqoqqissaartullu iluaqutigalugit.

Angalanissamut pilersaarutit. Nunap sananeqaataanut paasissutissanik suliaqartartut ukiup ingerlanerani angalanissamut pilersaarutinut nutaamik nunap assiliornermi nunallu assinginik tunngaviusunik nutarterinermi akuulluinnartarput.

Kalaallit Nunaanni Nunaminertanik Nalunaarsuiffik - NIN – Asiamit aqunneqarpoq. Nittartakkami sulianik ingerlatsisut illuutit nunaminertallu akuersissutigineqarsimasut pillugit paasissutissanik ikkussuisinnaapput, nunaminertallu GIS-imi nunap assiliorneqarsinnaallutik.