Asiaq 2006-imi University of Alaska Fairbanksimik, Artek-imik (DTU) aamma DMI-mik suliniut ukiunik pingasunik sivisussuseqartussaq pillugu suleqateqalerpoq, tamatumanilu siunertarineqarpoq Kalaallit Nunaanni Alaskamilu qeriuaannartup siammarsimaffianik misissueqqissaarnissaq najoqqutassiornissarlu.

Silaannaap pissusaanut najoqqutassiat, nunarsuup silaannaata ineriartorneranik taqamueriaanermut atorneqartartut nunarsuup silaannaanik ilisimasatta qarasaasiallu naatsorsuisinnaanerisa annertusiartornerat ilutigalugu pitsanngoriartortuarsinnarput. Qeriuaannartup siammarsimaffia nunarsuarmi najukkamilu pissutsinit aalajangerneqartarpoq, silaannaallu pissusaanut najoqqutassiat maannamut najukkami pissutsinik allaaserinnissinnaasimanngillat. Suliniummi siunertaq tassaavoq DMI-mi silaannaap pissusaanut najoqqutassiap najukkamut isiginninniarfiunerusup HIRHAM-ip qeriuaannartup ilisimatusaatigineqarneranut tapertaliunneqarnissaa. Suliassaqarfiit taakku marluusut akornanni suleqatigiinneq Kitaani (issittup silaannartaata immap killinganiittup) Alaskamilu (issittup silaannartaata nunavimmiittup) qeriuaannartup siammarsimaffiata allanngoriartorneranik taqamueriaanernik 2050-ip tungaanut atuuttussanik kinguneqartussaavoq. Taqamueriaanerit nunap assinginik, qeriuaannartoqarfiit aakkiartornermut misikkarilluinnartuusut tikkuartorneqarfigisaannik, suliaqarnermut tunngaviussapput. Nunap assingi taamatut pissusillit angallannikkut attaveqaatit, illoqarfinnik ineriartortitsinerit nunaminertanillu allatut atuineq pillugu pilersaarusiornermut atatillugu nalilerujussuanngussapput. Nunap immikkoortuini taakkunani marlunni paasissutissanut najoqqutassiaq toqqammavissaqartilerniarlugu Kalaallit Nunaanni Alaskamilu uuttortaavinnik najukkani silaannaap pissusiinik nunap qulaani ataanilu uuttortaanissamut atugassanik ikkussuisoqarsimavoq.

Attaveqarfigiuk Keld Hornbech Svendsen