Ukiuni kingullerni qulini ilisimatoorpassuarnit nunarsuarmit tamarmeersunit Dansk Polarcenterip Tunup Avannaarsuani Zackenbergip qooruani ilisimatusarfiutai atorneqartarsimapput. Asiaq KlimaBasisimik pilersaarummik isumaginnittuuvoq, tassanilu ilisimatusarfimmit silaannaap pissusaa pillugu paasissutissanik katersineq, pitsaassusersiuineq ingerlatitseqqiisarnerlu pineqarput.

KlimaBasis siunissaq ungasinnerusoq eqqarsaatigalugu alaatsinaannissamut pilersaarutinut sisamaasunut ilisimatusarfeqarfiit arlallit peqataaffigisaannut ilaavoq:

• KlimaBasis – Asiaq
• GeoBasis – Geografisk Institut, Københavns Universitet, aamma Issittumi Avatangiisinut Immikkoortortaqarfik, Danmarkimi avatangiisinik misissuinerit
• MarinBasis – Kalaallit Nunaanni Pinngortitaleriffik
• BioBasis – Issittumi Avatangiisinut Immikkoortortaqarfik, Danmarkimi avatangiisinik misissuinerit aamma Biologisk Institut, Københavns Universitet

Zackenbergimi misissuinerit aqqutigalugit issittup issinnerusortaani pinngortitap ataqatigiinnerata katitigaaneranik, atuuffianik ingerlariaasianillu paasisat pitsanngortinneqassapput tamatumalu peqatigisaanik issittumi avatangiisit allanngoriartornerannik alaatsinaannermut tapertaassallutik.
 
Paasissutissanik sukumiinerusunik perusukkuit attaveqarfigisinnaavat Dansk Polarcenter